Қазақстандық жұлдыздар 24 маусымда жарылыстан зардап шеккен Арыс пен оның тұрғындарына арнап ән жазды, деп хабарлайды ҚазАқпарат Мәдениет және спорт министрлігінің баспасөз хатшысы Айдар Қырықбайдың Facebook парақшасына сілтеме жасап.
«Біз біргеміз!» деп аталатын жаңа туындының әнін жазған - талантты композитор Ринат Гайсин, ал сөзі - айтыскер ақын Данияр Алдабергеновтыкі.
«Бұл шығармада арыстықтар бастан өткерген қиын-қыстау күндер туралы айтылады. Шағын қаладағы қайғылы жағдай ешкімді бей-жай қалдырмады. Бүкіл қазақстандықтарды біріктірген оқиға туралы әнді бірқатар қазақстандық жұлдыздар бірге шырқаған» делінген хабарламада.
Жаңа туындыны Жанар Доғалова, Нұрболат Абдуллин, Диная, Маржан Арапбаева, Бейбіт Қошқалиев, Әли Оқапов, Айри және Нұржан Керменбаев секілді әншілер орындайды.
Add new comment